Œuvre

Un amour tout nouveau embrase ma poitrine,
Je perds secondement ma chere liberté,
Et n’aymant que les fers et la captivité,
J’esclave ma raison sous ce qui la ruine.

Hé ? que doy-je penser, qu’est-ce que j’imagine ?
Quel est ce changement, et quelle deité
Ores peut tant sur moy ? je suis ja surmonté,
Et si ne sçay d’ou vient ceste force divine.

[Seconde partie]
Narcisse se mirant, tout embrasé mourut :
Ixion trop hardi mesme hasard courut,
Trompé par Jupiter d’une semblance vaine :

L’un fut deceu par l’ombre et l’autre par le vent.
Mais je n’ay nul objét pour sujet de ma peine,
Car le faux ni le vray ne causent mon tourment.