Work

Quand j’estois caressé de vous,
Et qu’aucun ne touchoit vostre teton que moy,
Pensant estre seul entre tous,
J’ay vescu plus heureux, voire que n’est le Roy.

Quand j’estois seule vostre amour,
Et qu’encor de ce feu d’Anne n’estiez épris,
Mon nom plus celebre en la cour,
Emportoit de Cassandre en tout honneur le pris.

Pour vray, Anne à present me plaist
Du doux son de sa Lire et de son œil acort :
Pour qui (tant son amour me plaist)
J’encourroy librement, une cruelle mort.

François est ore mon soucy,
Nos cœurs sont reunis d’un favorable acord,
Pour luy (tant je le prise aussi)
Deux fois s’il se pouvoit, j’endurerois la mort.

Mais quoy ? si le premier desir
Nous rangeoit de rechef soubs le joug ancien,
Laissant d’Anne le doux plaisir,
Vostre huys donc me seroit libre comme est le sien.

François est jeune et gratieux,
Beau comme est le Soleil : vous colere et jaloux,
Mais encor aymeroy-je mieux
Supporter vostre humeur, pour vivre près de vous.

O beau couple d’heureux amans,
Desormais reprenez vos mutuels desirs :
Et sans crainte de changemens,
Passez l’âge qui reste aux amoureux plaisirs.