Work

Gentil Rossignol cazanier,
Tu surmonte le passager,
En milles gentilles façons
Ceux qui ont admiray tes sons
En porteront bon tesmoignage.
Chante tu pas ton chant ramage
Dedens ta prison emmoussée,
D’un beau drap verd entapissée?
He que plaisante est ta chanson,
Au pris de celle du buisson,
Qui chante naturellement,
Trois ou quatre mois seulement,
Ayant la voix si tres mignonne,
Qu’au temps que sa gorge resonne
Par les bois, buissons, et forests,
Touche un amoureux de si pres,
Qu’au cueur luy engendre une envie
D’avoir entre ses bras s’amye,
Pour y faire quelque sejour,
Et y gouster les fruicts d’Amour,
En y prenant tout à loisir,
Autant qu’on y peut de plaisir.